Queridas companheiras: Vai chegando ao seu fim 2025

Queridas companheiras:

Vai chegando ao seu fim 2025 e é tempo de botar a vista atrás, fazer balanço coletivo e colher pulo para o que está por vir. 

Ao longo deste ano, o Centro Social A Pedreira consolidou a sua andadura e, com apenas três anos de existência, podemos afirmar com orgulho que se converteu num referente comunitário, cultural e político na cidade. Forom centos de atividades organizadas: concertos e foliadas, obradoiros, roteiros, apresentaçons de livros, palestras, exposiçons, contacontos, teatro… além dos cursos regulares e de grandes citas já imprescindíveis como a Festa da Língua, o Lume Novo ou o Magusto Associativo.

 

2025 foi também um ano marcado pola pressom institucional e repressiva. A orde de feche do local condicionou fortemente o nosso trabalho; o conflito coa Deputaçom pola normativa ortográfica; as multas e acusaçons contra companheiras; e a criminalizaçom da solidariedade coa Palestina deixarom claro que defender o comum, a língua e a dignidade coletiva segue a ter custos. 

 Longe de nos deter, estas agressons servirom para afiançar a nossa posiçom. Participamos ativamente na grande mobilizaçom contra Altri e ENCE, tivemos presença destacada nas protestas contra a participaçom da equipa israelita na Volta Ciclista e seguimos a fortalecer alianças e cumplicidades com outros coletivos e movimentos da cidade e do país. 

 Entre os passos mais ilusionantes do ano está a consolidaçom da Eira do Jogo, um espaço de socializaçom em galego para a infância da Pedreira, que nom deixa de medrar e que já aponta cara à possibilidade real de abrir umha Escola Semente em Ponte Vedra. Porque assegurar a transmissom da língua e da cultura às novas geraçons é umha tarefa central de qualquer projeto emancipador. 

Todo este caminho foi possível graças à implicaçom constante das associadas: das que sustentades o dia a dia do centro, das que estades nos grupos de trabalho, das que participades nas assembleias, das que botades umha mao no voluntariado dos grandes eventos e das que ajudades a dar a conhecer a Pedreira, partilhando conteúdos, animando à participaçom e trazendo novas pessoas. A Pedreira medra quando se fala dela, quando se habita, quando se assume como própria; quando se entende nom como um serviço, senom como umha ferramenta coletiva de construçom nacional e mudança social. 

O próximo ano apresenta desafios importantes: atopar um novo local que nos permita continuar o projeto; organizar as Olimpíadas Populares Galegas; apoiar a materializaçom da Escola Semente; e seguir fazendo da Pedreira um espaço aberto, vivo, crítico e útil para o povo. 

Encaramos o que vem com confiança e energia coletiva, sabedoras de que contamos com um enorme potencial humano, tecido a partir do trabalho voluntário, do afeto, do compromisso e da consciência política. 

 Que 2026 nos traia mais galego vivido sem complexos, mais organizaçom desde abaixo e mais apoio mútuo, mais identidade partilhada e mais capacidade de resistir e criar. 

Que seja um ano de Pedreira forte, aberta e combativa, coa comunidade no centro, os pés bem firmes na Terra e a cabeça erguida. Seguimos juntas, fazendo caminho. Abertas a quem queira somar, participar e construir connosco este projeto coletivo.